Lebnskreislauf
Letzte Wocha bin i auf oana Beerdigung gwen.
Do hob i a grouße Sonnabluma gsehgn.
Wenn ma s’ genau oschaugn tuat,
erkennt ma an Lebenslauf guat:
Da (Familien-) Stamm wachst aus a’m Grob heraus,
So schaugts in unsam Lebn aa meistn’s aus:
Rechts hängan oite, sterbade Köpf am Stamm,
de si mit eahnane Kerndl vielleicht fortpflanzt habn.
Bei de untan Blütn siehgt ma an Nachwuchs kemma.
So tuat unsa Lebn aa meistens beginna.
Weit obn siehgt ma de, de auferstandn san,
und grod zum Himme nauf wachsn tan.
Ma solltat bei oana Beerdigung eha an d’Auferstehung denka,
ois de Köpf weit obi hänga.
’s Woana ghört dazua, es tuat entspanna.
Do irgendwann muaß’s wieda glanga.
Unsane Liabstn im Grob teana nix davo hobn.
Eahna is’s liaba, wenn ma uns de Tränen sparn.
Bei da Sonnabluma könn ma’s nacht’s Jahr sehgn,
wia’s wieda an Nachwuchs tuat gebn.
Des Lebn tuat oiwei weita geh.
Is des net schee!
Gedicht und Foto: Marga Weingartner
