A kloana Maibaam irgendwo in ana kloana Ortschaft in Beuern. De scheena Festl mit Maibaamaufstelln ham ja heia a wieda ned obghoitn wern kinna. A kloane Gruppn junga Burschn hod si trotzdem zsammado und de letztn Wocha an echtn Maibaam hergricht, a bissal kleana hoid – aber ois dro, gschebbst, mit weissblaue Rautn ogmoin, Taferl dro und omdrauf ois Spitz no an scheena Wetterhahn.
Heit am 1. Mai is a dann aufgstellt worn, mit Schragn, Schwaibal, Staksl und Manneskraft. De Burschn mit da Kurzn Hosn samt dem koidn Wedda. A Ziachara und da Radio ham zur musikalischen Unterhaltung beitrogn. Da Maibaammoasta hod mit klare Kommandos zum erstnmoi ogschafft und mit seine Leit des scheene Stangal kerzngrod higstellt. A a boor Zuschaua aus da Nachbarschaft ham vorbeigschaut und sich richtig gfreid, das iatz da erste Maibaam in …. stääd.
War a scheena Dog für olle – und doch wart ma wieda olle auf de Zeit wo ma so a Fest mit Blosmusi, Schweinsbrodn, Fasslbier und vui Leit endlich wieda a moi feiern derf.
Bericht und Bilder: Georg Wachinger, Wachinger-Mühle Neubeuern
