Meisterkonzert
Letztn Sonntag hob i im Happinger Hof a spitze Musi ghört.
Des war a echts Konzert.
De drei Musikantn hobn gspuit, sakrisch guat.
De hobn de ganz Musi im Bluat.
I hob meine Ohrwaschl fest gspitzt.
A jeda Ton is ganz sauba gsitzt!
A’n „Drittn Mann“ hobts bestimmt scho amoi ghört.
Alloa „Da Weg zum Herzn“ wars Kemma wert.
Am Wolfgang eine Finga san aufm „Greigotta“ rum gflitzt,
Auf da Kontra-Gittarr hot da Peter de 14 Soatn mit Gfui o’gritzt.
Da Schreier Karl is rum ghetzt auf da „Wanznpress“ mit seine Finga.
Der hot schaugn deafa, dass er seine Klupperl net durchananda tuat bringa.
De Stückl san wirkli anspruchsvoi gwen.
I hobs auf’m 1. Platz net bloß ghört, sundan aa gsehgn.
In meine Ohrwaschl werdn de Stückl no lang klinga.
I tuas oiwei laut pfeifa in da Duschn drinna.
Gedicht und Foto: Marga Leingartner
