Zahlenhexerei zum Jahr 2022 – ein Gedicht von Marga Leingartner aus Rosenheim
Drei Zwoara müass ma bei da nei’n Jahreszoi schreibn.
Des tuat ganze 365 To lang so bleibn.
Des neie Datum tua i heit scho übn,
damit des bis Neijahr in meim Hirnkastl is drinn.
Wenn da Nulla an da vakehrtn Stell steht,
Dann bin i entweda nimma do, oda mi gibts no net.
richtig: 2022
ganz foisch: 0222 – 2202 – 2220
Deats Eich net geniern!
Des müaßts selba amoi ausprobiern!
Wenn des sogar i fertig bring,
dann is des für Eich a leichts Ding.
Da 22. Februar, des Datum is zum Varecka,
weil sechs Zwoara und zwoa Nulla im drinn stecka.
Ma konn’s vo vorn oda vo hintn schreibn,
des Datum tuat oiwei des gleiche bleibn.
Wenn ma den Punkt tuat andas setzn,
dann ko ma’s am bestn vo rechts lesn:…..
22.02.2022 2202.20.22
Macht ma aus’m Zwoara an Strich draus,
schaugt des glei vui deitlicha aus:
I I . 0 I . I 0 I I I I 0 I . I 0 . I I
Is’s Eich jetzt scho schwindlig wordn,
vom Lesn vo hint und vorn?
Wenn oana Arabisch ko,
der is natürli bessa dro.
I glaab net, dass des mei Hirnkastl jemois tuat schaffa.
Am bestn i tua den ganzn Tog vaschlaffa.
Und loß den ganzn Tog meine Augn bis 0:00 Uhr zua,,
Dann hob i vo dem ganzn Scheiß mei Ruah.
Gedicht und Foto: Marga Leingartner
