Bild und Betrachtungen von Marga Leingartner aus Rosenheim
Verkehrte Welt
An Gockl aufm Hausdoch werds öfta gebn.
Aba a Taubn drauf hob i no net gsehgn.
De Taubn ko dem Gockl no so schee toa,
I glaab, der bleibt liaba alloa
Hot si de Taubn aufn Gockl hi ghockt,
dass s’ a scheenane Aussicht hot?
Natürli hockt s’ ganz auf seim Haupt drobn,
weil s’ do weita obi schaugn kon.
De Taubn packt den Hahn mit ihre Kralln am Kopf.
Der arme Tropf!
Der arme Kerl ko si net rettn,
weil s’n fest gschwoaßt hobn an da Pfettn.
De Henna im Gartn
werdn sehnlichst auf ihrn Herrn wartn.
Sie könnan koane Oa legn
ohne dem Herrscher sei’m Segn.
Wos soin mia Menschn macha?
Ohne Oa, des is net zum Lacha.
Da Ostahos muaß si wos nei’s ausdenka,
wenn er koane Oa mehr ko schenka.
