Hagelkugeln – ein Gedicht mit Foto von Marga Leingartner
Wia i in Heilig-Bluat bin untawegs gwen,
hob i massnhaft Haglkugeln gsehgn.
De san vo ganz weit obn obi kumma,
weils an Durchmessa vo 4 Zantimeta hobn ognumma.
De hots auf Bleamestengl nauf ghaut.
Wia lauta Lutscha am Stiel hot des ausgschaut.
De Sunn kannt lang hie schlecka
bis olle tean varecka.
Mi daat intressiern, wiavui des sand.
Wenn i bloß bis 3 zähln kannt!
Vielleicht deats Ihr des für mi
bevor de ganz Pracht is dahie.
Wenn si a starka Wind tuat austobn,
bleibt koa oanzigs Kerndl mehr am Stiel obn.
Drum deafts Eich schicka, bittascheen,
sunst i’s des für heia gwen.
