Hemadlenzn oda Hemadlenzen nennt man an Faschingsumzug in da obaboarischn Stod Dorfen am narrischn Pfinzda. Da Hemadlenzn-Umzug wead seit eppa 100 Joar duachgfiat. Rund 1000 Dorfena Biaga ziagn in weissn Nachthemadn, weissn Untahosn und Zipfemitzn singend und feiand duach de Innenstod.
In an Kefig wead da Winta in da Gstoit vo ana Strohpuppm ban Umzug mitgfiat. Nachm Rundgang duach de Stod wead de Hemadlenz-Puppm, kuaz vor Zwejfe am Marienplotz ghengt, vabrennt und so da Winta austriebm. Dabei wead gjubet und de Dorfena Noarnhymne gsunga. Am „Dorfena Nationalfeiadog“ hom olle Schuin zua.
Begriff – Da Begriff Hemadlenz moant in Oidbayern an Menschn, dea wo nua a Hemad ohod.[1] Lenz kimmt dabei vom Nama Lorenz bzw. Laurentius. Dees hod woascheinli mitm Hl. Laurentius z doa, dea wo oft nua im Hemad doargstejd wead.
Bericht: Boarisch Wikipedia – Fotos: Ilona Unertl
