Zum Neuen Jahr 2022 ein Gedicht um Bild von Marga Leingarten aus Rosenheim
A ganz a nei’s Neijahrsfest 2022
Zum Neijahr loss ma heia koane Raketn steign.
De müassn oisamt heruntn bleibn.
Mia machan koan Krach mia dean singa,
Dass’s bis ins Weltall tuat klinga.
Pünkli um 0:00 Uhr fang ma o.
Bloß oa Sekund spata, san ma z’spat dro.
Mia brachan koa bsundas Liad singa.
Vielleicht losst a jeda irgendoan Jodla klinga?
Wenn a jeda jodelt, egal wo er is,
werd des Ganze echt guat, gwiß.
Des ko in da Dusch’ sei, oda aufm Klo.
Des gibt bestimmt a scheens Solo.
Des soi uns erst oana nochmacha.
De meistn könnan’s bloß lossn kracha.
Hoffentli gehts übaroi weita so.
An unsinnigen Krach brauch ma nirgendwo!
Des werd a beeriga Neijahrsanfang
ohne Feiawerk und ohne Gstank.
Sowas hots no nia gebn,
in mei’m ganzn Lebn.
Foto und Gedicht: Marga Leingartner, Rosenheim
